Xa comeza a ulir a outono, mañás frías, follas caendo e hortas con cabazas! E eu a verdade é que non son moi seareira das cabazas asadas, mais en lambetadas gústanme ben. Así que cando atopei unha que xa se separara da planta, vin a oportunidade de facerlle unha homenaxe con este pan de cabaza. Non é un pan como tal, é un biscoito suave, esponxoso e cun sabor espectacular. Leva especias, cabaza, chocolate e noces. Leva todo o que precisa para ser o biscoito estrela deste outono. E ademais, a preparación non pode ser máis rápida e sinxela. Mesturar ingredientes secos, mesturar húmidos, xuntar e enfornar. E o arrecendo que deixa pola casa…mmmmmm, iso si que é ulir a outono!
Para facer o puré de cabaza, eu saqueille as sementes e pelei unha cabaza tipo pera. Despois cocina e deixena nun coador para que non tivese un exceso de auga. Este tipo de cabaza ten a carne máis dura e máis doce, polo que é ideal para sobremesas, pois non engade auga de máis ás preparacións e dálle un sabor máis doce. As especias tamén lle quedan de marabilla e son as que fan que este pan de cabza quede tan rico.
Print
Ingredientes
220 gramos de fariña triga
1 culleradiña de bicarbonato
2 culleradiñas de canela en po
1/4 de culleradiña de noz moscada
¼ culleradiña de cravo moído
¼ culleradiña de xenxibre en po
1 belisco de sal
2 ovos
100 gramos de azucre branco
150 gramos de azucre moreno
330 gramos de puré de cabaza ben escorrido
120 ml de aceite de xirasol
60 ml de zume de mandarina
1 mandarina relada
120 gramos de chocolate negro picado
80 gramos de noces picadas
Molde rectangular de 24×11
Preparación
- Comezamos mesturando os azucres coa reladura de mandarina, fregando cos dedos para que deixe máis sabor.
- Por outro lado, mesturamos todos os ingredientes secos, peneirándoos para que quede o biscoito máis esponxoso.
- E batemos tamén os húmidos: o puré de cabaza, os ovos, o aceite, e o zume de mandarina.
- Xuntamos todas as mesturas e batemos ata que a fariña estea integrada. É importante non bater de máis.
- Engadimos o chocolate e mais as noces picadas, deixando unhas poucas para despois botar por riba do molde antes de enfornar.
- Forramos un molde con papel de forno e manteiga ou aceite, vertemos a masa e botamos as noces e o chocolate que tiñamos reservado.
- Enfornamos co forno xa quente a 175º durante unha hora e 15 minutos. Xa sabedes que o tempo depende un pouco de cada forno, entón o mellor é comprobar co escarvadentes. Debe saír seco, mais pode saír con alguha farangulla pegada (ou manchado de chocolate!)
Aquí cómpre ter paciencia. Hai que deixar que o biscoito arrefríe totalmente antes de poder catalo porque é un biscoito que queda moi suave e se o cortamos quente, o probable é que nos rompa. Aguanta varios días sen problema fóra da neveira, se non hai un exceso de calor. Ao igual que o pan de banana, sabe moito mellor ao día seguinte.
