Chega Samaín e toca facer lambetadas! Xa sei que non ten por que ser así, mais a min xa me vale. E a vós de seguro que tamén, sobre todo despois de ver o sinxelas que son estas bolachas de Jack Skellington. Porque se hai unha película mítica nestas datas, non me podedes negar que esa é Pesadelo antes do Nadal. Eu declárome seareira! E aínda que cociñar non sexa o voso, esa receita é tan doada que nin moito xeito hai que ter para que saian ben. Ademais, se tedes miúdos pola casa, poden botarvos unha man (e un dedo!) na elaboración.
Saen unhas 12 bolachas de 35 gramos cada unha. E o ingrediente máis raro é o leite condensado. De todas maneiras, se vos apetece facelas e non tedes leite condensado, fixemos unhas bolachas de corazóns que tamén se poderían facer así e levan manteiga. Así que kukis, non hai desculpa posible! Ah! E a marmelada pode ser do voso sabor favorito. Ou podedes facerlle un ollo de cada cor. De seguro que as crianzas vos axudan a facelas ben chulas!
Print
Ingredientes para 12 bolachas
75 gramos de manteiga
200 gramos de leite condensado
1 xema de ovo
160 gramos de fariña triga
1/2 culleradiña de fermento químico
1 belisco de sal
marmelada de amorodo
chocolate negro
Preparación
- Comezamos derretendo a manteiga no microondas ata que fique brandiña. Uns 10-20 segundos.
- E mesturámola co leite condensado.
- Despois botamos a xema e batemos de novo.
- Engadimos tamén o fermento e a fariña e mesturamos cunha culler ou espátula.
- Deixamos que a masa repouse uns 20 minutos.
- A continuación, facemos bólas dun 35 gramos cada unha.
- Aplanamos cada unha lixeiramente e facemos dúas marcas para os ollos coa xema dos dedos.
- Cun pauciño, facemos os buratiños do nariz.
- Enchemos o que serán os ollos coa marmelada de amorodo e tamén os buratiños do nariz. Podemos botar a marmelada nunha manga pasteleira ou nunha bolsa de conxelar cun buratiño.
- Enfornamos a 180ºC durante uns 16 minutos ou ata que vexamos que comezan a ficar douradiñas.
- Sacámolas do forno e deixamos que repousen na bandexa uns 5 minutos.
- Despois pasámolas á grella e deixamos que arrefríen por completo.
- Derretemos un pouco de chocolate e poñémolo nunha bolsa de conxelar cun pequeno burato nunha das puntas. Facemos primeiro o sorriso, e despois iremos facendo unhas mini raias para que nos quede o sorriso de Jack perfecto.
Xa vedes que non teñen dificultade ningunha e son taaaaaaan riquiñas!!! Non vos podo dicir moito se aguantan moitos días ou non porque voaron! O que si vos podo dicir é que están moi ricas. A textura non é moi croante, senón abiscoitada e suave. O sal é opcional, mais ese punto salgado quédalle de medo.
