Aínda sendo consciente de que a cantidade de persoas que van facer esta receita son poucas, aquí estou. Eu devezo polos takoyaki. Teñen todo o que me gusta: unha masa cremosa, uns prebes deliciosos e son de Xapón. Así que pouco máis podo pedir. O malo é a infraestructura. Aínda que non sabedes o ben que nos veu ter unha cociña de gas durante o apagamento. Pois iso, que fai falta un molde especial para preparalos. O meu foi un agasallo de Nadal, dígovolo por se queredes ir xa facéndolle unha petición ao Apalpador. Tendo o molde, non é unha receita moi complicada. E seguramente vos estaredes a preguntar polos ingredientes. Os ingredientes máis especiais merqueinos todos en Compostela, na tenda Asian Market, na Rúa Santiago del Estero, número 5, polo que non hai que pedilos por internet nin nada.
Os ingredientes que non atoparedes en calquera tenda son o caldo dashi, o katsuobushi, o xenxibre encurtido, os tempura crisps, o kewpie e o prebe de takoyaki.
O resto dos ingredientes atoparédelos en calquera tenda. O paso a paso é un chisco longo porque é difícil de explicar como hai que ir facendo todo, mais de seguro que vos sae xenial. A verdade é que fixemos moitas probas ata dar con esta receita, que pensamos que está moi boa de textura e de sabor. Os takoyaki están recheos de polbo, por iso son tako, que é como se di polbo en xaponés. Mais nós xa probamos con queixo e están moi ricos. Así que se non sodes moi de polbo, sempre podedes botarlle outro ingrediente que vos guste. Ou non botarlle nada, que unha vez foiseme botarlle o polbo e non houbo moita queixa 🙂
Print
Ingredientes para 48 takoyaki
- Para a masa
250 gramos de fariña triga
2 sobres de 6 gramos de caldo dashi en po
8 gramos de soia
1050 gramos de auga
1 ovo
- Para os takoyaki
1 bolsiña de anacos de tempura (tempura bits/crisps)
xenxibre encurtido
ceboliño
1 pata de polbo cocido xeitosa
Mahonesa kewpie
Prebe de takoyaki
Katsuobushi
Aceite de xirasol
Preparación
- Comezamos preparando a masa para os takoyaki. Podemos facela pola mañá, unhas horas antes, ou despois de comer para a cea… É dicir, venlle ben que repouse. Para a masa é ir mesturando os ingredientes: auga, soia, ovo, fariña e o caldo dashi. Poden quedar gromos, mais non pasa nada, despois desfaranse, non vos preocupedes. Tapamos, deixamos na neveira e preparamos o resto dos ingredientes que precisamos.
- O mellor é ir preparando todos os ingredientes en diferentes cunquiños para despois telo todo dispoñible. Picamos o ceboliño.
- E mesturámolo cos tempura bits/crisps. Botamos o sobre enteiro, que son 50 gramos.
- Por outro lado, picamos o xenxibre e reservamos. Non vos poño cantidades porque depende moito da cantidade que vós lle queirades botar. Eu engado uns 3 ou 4 anaquiños en cada takoyaki, tamén depende un pouco de cantos me caian, sendo sincera 🙂
- Cortamos a pata de polbo en anacos como para o polbo á feira, máis ou menos. Eu córtoos máis pequenos polas crianzas. Adoito poñer un anaco ou dous en cada takoyaki.
- E colocamos perto tamén o prebe do takoyaki, o kewpie (mahonesa xaponesa), e o katsuobushi (atún seco, fermentado e afumado).
- Sacamos a masa da neveira e veredes que ten esta pinta. Si, o caldo quedou por riba e o resto para abaixo. E como podedes comprobar, nada de gromos. Batemos cando a vaiamos botar na máquina de takoyaki.
- Poñemos a quentar a cociña de gas co molde de takoyaki a lume medio-baixo e botamos un pouco de aceite de xirasol en cada burato.
- Despois botamos a masa xa remexida tapando todo o molde. Non só os buratos, senón todo, como vedes na imaxe.
- Despois botamos uns anacos de polbo, os anaquiños de xenxibre e un pouco de mestura de tempura e ceboliño en cada burato. Como veredes, os anacos de tempura vanse poñendo máis gordechos ata que se desfan e fan que quede a masa máis cremosa.
- Agora coa axuda dun ou 2 pauciños temos que ir separando a masa dos laterais do molde e entre os buratos.
- Pasados uns minutiños, dámos media volta a cada takoyaki. De principio só media, e así xa imos botando para dentro de cada burato, a masa que fomos despegando previamente dos laterais e do medio.
- Deixamos que se cociñe durante uns segundos máis. Aquí xa é menos tempo, e xa lles damos a volta completa. Cos takoyaki, hai moito de ‘trust the process.’ Ás veces, pode parecer que queda masa por todas partes e non van saír, mais confiade, que si saen. Pode que os vexades moi espeluxados, mais ao final, acaban quedando redondiños e moi douradiños.
- Despois de darlles a volta, iremos cos pauciños dando voltas pouco a pouco para que vaian quedando dourados por todos os lados por igual. Se vedes que quedan máis torrados os do centro, podedes mudalos de sitio e poñer os que están máis na beira para o centro.
- Cando xa teñan boa pinta, sacámolos para un molde ou prato. Eu merquei estas barquiñas porque era onde adoitaban poñérnolos en Xapón e facíame ilusión.
- Botamos o prebe de takoyaki.
- E a kewpie.
- E rematamos co katsuobushi. Se nunca vistes como fai o katsuobushi, veredes que coa calor, baila 🙂
E xa teriamos os takoyaki preparados. Tamén hai quen lle bota un pouco de alga nori en po por riba. Ollo que saen moi quentes e aínda que poida parecer que están mornos por fóra, por dentro poden rabear. Con esta receita saen 48 takoyaki, é dicir, para 3 quendas de 16, que é o que saen de cada vez. Se alguén quere saber o modelo do molde que temos nós ou o da cociña de gas, non dubidedes en escribirme por aquí ou polas redes sociais. E aquí queda a receita, que aínda que non a faga ninguén, quédame para min, para saber os ingredientes para a próxima vez. E se vos animades, contádemo porfi!
