Non sei se a vós tamén vos pasa, mais ás veces custa bastante pensar que facer de xantar ou cear. E ter unha boa listaxe de receitas á man, que ademais, sexan rápidas e sinxelas, vén moi ben. Estes roliños de tortilla son unha moi boa opción para algo rápido. E ademais, é unha receita bastante saudábel e facilmente adaptable aos vosos gustos.
Eu déixovos a miña receita, e como os fago eu, mais como é tan sinxela de preparar, o meu consello é que empreguedes verduras de tempada. A súa consistencia é moi ciumenta, non se fan nada secos e son unha moi boa opción para levar de comer ao traballo ou de picnic. E se andades a buscar receitas de picnic, estes onigiris son os nosos favoritos.
Print
Ingredientes para 4 roliños
100 gramos de repolo chinés
4 ceboliñas
1 pouco de coandro fresco
2 tomate mediano
8 ovos
sal e pementa
4 masas de tortillas mexicanas
Preparación
- Cortamos o repolo en tiras e picamos as ceboliñas (só a parte branca) e o coandro.
- Cortamos tamén o tomate en cadradiños.
- Batemos os ovos e engadimos as verduras que cortamos xunto co sal e a pementa.
- Cun pouco de aceite, nunha tixola, botamos unha cuarta parte da mestura, máis ou menos ata que cubra a base da tixola.
- Cando comece a callar, aínda que non de todo, poñemos a masa de tortilla enriba e presionamos lixeiramente.
- Dámoslle a volta e deixamos que a masa se dore lixeiramente.
- Sacamos da tixola e aínda quente, enrolamos para facer o roliño.
Agora só queda cortalo en dous anacos e xa está quedaría preparado. Se queredes facer máis cantidade, só precisades dobrar a cantidade de ingredientes. A verdade é que esta combinación queda moi ben, mais como vedes, é sinxelo facelo con outros ingredientes que teñamos pola casa. Ou ben aproveitar sobras doutros pratos. Como sempre vos digo, é cuestión de probar! Para unha versión sen glute, as tortillas de millo van perfectas. E se queredes acompañalos cun prebe, só tedes que mesturar 2 culleradas de mahonesa con 2 culleradas de ketchup ou prebe de tomate.
