Nunca probara eu a facer estas bolachas. E mira que houbo unha época que estaban por todos os lados. E teño que dicir que que mágoa non telas probado antes. Están boísimas e non vos teñen nada de complicación. As whoopie pies veñen sendo dúas bolachiñas medio abiscoitadas cun recheo cremoso. Disque son unha receita dos Amish e é a bolacha oficial do estado de Maine. Que por certo, grazas a isto, aprendín que hai estados que teñen a súa bolacha e a súa sobremesa oficial. Cal podería ser a nosa lambetada oficial? Habería estar complicado escoller só unha, non si?
O sabor das whoopie pies é especial. As bolachas teñen unha textura similar á dos biscoitos, mais cun sabor intenso a chocolate. A min o sabor recordoume ao dos brownies, para que vos fagades unha idea. E o recheo é cremoseiro de todo, e con sabor a queixo. Non é excesivamente doce, mais as bolachas si son larpeiras, polo que o equilibrio é perfecto. Non é unha receita complexa, e non se tarda nada de tempo en facer. Con esta receita saen 6 whoopie pies, é dicir, 12 bolachas.
Print
Ingredientes para 6 whoopie pies (12 bolachas)
- Para a masa das bolachas
120 gramos de chocolate negro do 70%
30 gramos de manteiga
60 gramos de ovos
90 gramos de azucre
90 gramos de fariña
3 gramos de fermento químico
1 belisco xeneroso de sal
100 gramos de cacao
- Para o recheo
150 gramos de crema de queixo
70 gramos de manteiga
25 gramos de azucre en po
Preparación
- Derretemos o chocolate xunto coa manteiga no microondas ata que estea ben mesturado.
- Batemos os ovos xunto co azucre durante uns 5 minutos ata que a mestura fique cremosa.
- Mesturamos ámbalas dúas mesturas.
- E engadimos a fariña peneirada e máis o fermento e o sal, integrando con movemento suaves.
- Deixamos a masa na neveira durante 15 minutos para que quede máis dura e manexable.
- Formamos bólas de 30 gramos cada unha e aplanámolas lixeiramente cando as poñamos sobre o papel de forno na bandexa.
- Polvilla cacao en po por riba e enforna a 180ºC durante uns 10 minutos. Deixamos arrefriar mentres imos preparando o recheo.
- Tanto a manteiga como a crema de queixo deberán estar a temperatura ambiente. Se non o están, o meu consello é meter a manteiga un chisco no microondas ata que fique medio brandiña. Se non facemos asi, corremos o risco de que aparezan gromos. Agora só temos que mesturar todos os ingredientes e bater durante uns minutos ata que fique cremosa.
- Poñemos o recheo nunha manga pasteleira ou nunha bolsiña de conxelar. Botamos a crema sobre unha das bolachas e tapamos coa outra. E faremos así con todas as metades.
Xa vedes que a dificultade non é moita. De feito, non se tarda nada e básicamente poderiase resumir en mesturar e enfornar. E se non vos presta este recheo, podedes empregar crema de chocolate, nata ou doce de leite, por exemplo. Ou simplemente facer as bolachas, e non poñerlles recheo. Non serían whoopie pies, mais estarían ben boas igualmente. Para conservalas, o mellor é deixalas na neveira. O recheo quedará máis duriño e aguanta uns días en perfectas condicións.
