Facer bolachas é, para min, un deses pequenos grandes praceres da vida. E estou segura de que isto xa o dixen máis dunha vez aquí no blogue. O normal é que despois de case 11 anos, xa comece a repetirme. Mais iso é porque o creo así de verdade. E tamén vos confeso que me gusta máis o proceso de facelas que o comelas. Cando chega o Nadal, a desculpa para facer as bolachas xa a temos. E de seguro que teremos pola casa algún trubinco para botarnos unha man. Estes bastóns de Nadal fanse moi rápido e quedan ben bonitos. Perfectos para agasallar, poñer nun agasallo para decorar ou para, simplemente, pasar unha tarde de frío ao calor do forno e ao arrecendo a bolachas.
Print
Ingredientes
200 gramos de manteiga
115 gramos de azucre
65 gramos de azucre en po
1 ovo
1 limón relado
400 gramos de fariña
1 belisco de sal
corante vermello
Preparación
- Mesturamos todos os ingredientes agás o corante.
- Cando teñamos a bóla de masa xa formada, dividímola en dous.
- A unha delas, botámoslle o corante. Se precisamos, engadimos 1 ou 2 culleradas máis de fariña.
- Imos collendo anacos de masa e facemos tiras das dúas cores.
- Despois enrolamos unha tira coa outra, e amasamos facendo un chisco de presión. Mais con coidadiño de que non se nos separe.
- Dámoslle forma de bastón.
- E enfornamos a 200ºC durante uns 10 minutos ou ata que vexamos que collen unha moi lixeira cor dourada.
- Deixamos que arrefríe sobre a grella.
Como vedes, a cousa non ten moita complicación e se non temos corante, sempre podemos botarlle cacao á masa e facelas de dúas cores. Estes bastóns de Nadal quedan crocantes por fóra e suaves e manteigosos por dentro. A textura perfecta para mollar nun chocolatiño quente, non si? Eu de vós, poñeríame coas mans na masa canto antes porque de verdade que paga ben a pena. E se non nos gustara o sabor do limón, sempre podemos botarlle reladura de laranxa, ou ben vainilla, anís ou azar.
