E xa que fomos a por flores de sabugueiro para preparar o xarope, agora temos que aproveitalo! Estes días de sol están ideais para preparar unha bebida refrescante con xarope e acompañala con estas madalenas. Si, son madalenas de limón con glasado de flor de sabugueiro. E están de vicio. A receita moi sinxela, coma sempre. E o glasado dálle un toque larpeiro e doce que fai que sexa imposible comer só unha. Só aptas para persoas ben larpeiras! Como vedes, cunhas sabedeiras flores de sabugueiro, temos a merenda xa preparada para sorprender e namorar!
Adoro facer madalenas. É un deses pequenos praceres da vida. Supoño que tamén inflúe que é unha receita que sempre me sae ben. E o resultado é ideal. As combinacións son infinitas. Non fai falla máis que botarlle un ollo ao blogue e ver todas as receitas que hai: de cereixas (que están agora en tempada!), de pistacho, de mazás, de nata e moitas máis. Eu de ti, buscaría por aí, porque de seguro hai algunha que te enche o ollo. Tamén teño que recoñecer que estes moldes de limonciños vanlles de marabilla, non si? Que bonitas quedan!
Print
Ingredientes para 8 madalenas grandes
- Para as madalenas
2 ovos
180 gramos de azucre
65 ml de leite
185 ml de aceite de oliva suave
210 gramos de fariña (metade de fariña de repostaría, metade de fariña normal)
7 gramos de fermento químico
un chisco de sal
1 limón relado
- Para o glasado
140 gramos de azucre en po
4 culleradas de xarope de flor de sabugueiro
floriñas para decorar
Preparación
- Mesturamos todos os ingredientes das madalenas e deixamos repousar na neveira durante unha hora. Poñemos o forno a quentar a 210ºC.
- Cando saquemos a masa da neveira, batemos de novo.
- Botamos a masa nos moldes das madalenas. Estes son bastante grandes, entón só saen 8. Se son moldes dos de toda a vida, probablemente saian 10 ou 12.
- Enfornamos durante uns 15-18 minutos dependendo do tamaño dos moldes. O escarvadentes cravado no centro terá que saír limpo.
- Deixamos que arrefríe e mesturamos o xarope de flor de sabugueiro co azucre en po.
- Cando as madalenas estean frías, botamos o glasado sobre as madalenas. Unha cullerada, máis ou menos, sobre cada unha.
- Decoramos cunhas floriñas de sabugueiro.
Eu creo que con esta receita xa vos convencín de todo para ir facerlle unha visita a algún sabugueiro, non? As combinacións son infinitas. Eu non llo botei, mais podedes botarlle un chisco de xarope (unha culleradiña) a cada madalena, para que queden máis húmidas e con máis sabor a sabugueiro.
