Non sei se a vós vos pasa, mais ás veces resulta complicado saber que facer de cear. Esta receita de pan de allo con queixo é rápida e sinxela. E pódese comer así, ou para acompañar un hummus, muhammara ou calquera paté. É algo que non require de ter moito xeito na cociña e, aínda que é unha receita sinxela, sen moita ciencia nin moitos ingredientes, o resultado é moi bo.
Esta receita dá como resultado un pan moi crocante e moi suave ao mesmo tempo. A suavidade danlla os queixos derretidos e mais a manteiga co allo. E a parte crocante, o pan. O equilibrio perfecto entre textura e sabor. Todo nunha receita do máis sinxela. E se non sodes moi de allo, non hai problema. Ao seren asados, non teñen ese sabor tan forte como crus, e quedan moi ben. Nós fixémolo con chalota, mais podedes botar só allo, se non tedes chalota pola casa. Aínda que si vos digo que lle dá moi bo sabor.
Print
Ingredientes
1 barra de pan tipo chapata
1 cabeza de allo
3 chalotas
sal, pementa e aceite de oliva
100 gramos de manteiga sen sal
pirixel fresco
fatias de queixo para sándwich
mozzarella relada
Preparación
- Sacamos a pel ás chalotas e cortámoslles as puntas.
- Cortamos a parte superior dunha cabeza de allos enteira. O xusto para cortar unha pequena punta e así poder sacar os allos cando xa estean asados.
- Botamos un chorro de aceite sobre os allos e as chalotas. E botamos tamén sal e pementa sobre os allos. Poñemos todo a asar ou ben nun molde con tapa apto para forno, ou ben envoltos en papel de aluminio.Enfornamos a 180ºC durante 1 hora.
- Mestura nun bol a manteiga, os allos asados (para sacalos, só hai que apretar pola parte de abaixo e xa saen), as chalotas (tamén faremos do mesmo xeito que cos allos), o pirixel fresco picado e unha culleradiña de sal.
- Abre o pan ao medio, e estende a mestura de manteiga por cada unha das metades.
- Pon fatias de queixo cremoso sobre cada metade do pan e cubre coa mozzarella relada.
- Enforna a 200ºC durante uns 20 minutos ou ata que vexades o queixo xa derretido e torrado.
- Bota un pouco de pirixel picado por riba, corta en anacos e xa estaría preparado.
Para facer este pan de allo con queixo podedes usar os queixos en función dos que máis vos gusten, ou dos que teñades a man. Tede en conta que quedará mellor se algún deles é máis cremoso e se derrete con facilidade.
