Pensando en receitas do Entroido, deime conta de que sempre penso na parte máis larpeira destas festas, que non é pequena! Orellas, filloas, chaolas, periquitos, bicas, flores, follas de limoeiro… Certo é que eu non adoito facer cocido na casa. E quizais foi por iso que nunca pensei en facer croquetas de cocido. Mais esta fin de semana, a miña nai fixo cocido, polo que tocou levar algunha carne e un pouco caldo para poder facermos unhas croquetiñas.
Non sei se algunha vez as fixestes ou as probastes, mais eu, que nunca antes as fixera, xa as considero unha das mellores receitas de croquetas do mundo mundial. Xa só co caldo, veredes que a masa colle un sabor espectacular. E a carne o que fai e resaltar aínda máis ese sabor, dando diferentes matices dependendo da carne que empreguemos. Polo demais, unha bechamel, moito remexer e tempo para formar e rebozar. Con todo isto, sairán unhas croquetas que son puro vicio.
Print
Ingredientes para unhas 60 croquetas de 35-40 gramos
300 gramos de manteiga
300 gramos de fariña triga
700 ml de caldo do cocido
800 ml de leite
Carne do cocido: costelas, touciño e codelo
Fariña, ovo e pan relado para rebozar
Preparación
- Cortamos toda a carne ben picadiña co coitelo.
- Preparamos a bechamel derretendo a manteiga.
- Cando estea derretida, engadimos a fariña e remexemos ben para que se cociñe a fariña a lume baixo.
- Botamos o caldo e mais o leite e mesturamos ata que estea todo ben integrado.
- Engadimos a carne picada e agora toca darlle voltas ata que se despegue con facilidade da tixola/pota.
- Botamos a masa sobre un molde (o máis longo posíbel para que arrefríe mellor) e tapamos cun filme transparente para que non quede dura masa por riba.
- Cando a masa estea ben fría, formamos croquetas. Podemos darlle forma de boliña.
- Pasamos as croquetas por fariña
- Ovo
- E pan relado
- E fritimos a lume medio-alto ata que estean ben crocantes por fóra e cremosas por dentro.
As croquetas de cocido podemos conxelalas antes de fritilas e telas xa preparadas para calquera ocasión. E se non vos presta moito rebozalas todas á vez, podedes tamén conxelalas despois de formalas, antes de rebozalas. Iso como vós vexades. Eu prefiro conxelalas rebozadas e despois só ter que fritir. Podedes, por suposto, facer menos cantidade, todo depende do caldo que teñades ou da carne que lle botedes. O máis importante é que as preparedes con cariño e as desfrutedes moito. E se queredes aproveitar as verduras e as patacas, sempre podedes preparar un trinxat.
