E chegou o día! O día da Candeloria e os paxariños xa están a emparellarse e a buscar o sitio perfecto para facer o seu niño. E eu, sigo coas lambetadas para a ocasión. Desta vez, uns bombóns recheos que están de vicio. Eu aproveitei uns moldes de corazón que tiña pola casa desde hai xa un tempo. Mais en verdade non precisades ningún molde especial, pódense facer en cubiteiras de xeo ou aproveitar medio brick de leite e facelo tipo tableta de chocolate. O recheo é moi sinxelo, mais queda boísimo.
Polo demais, a receita é ben sinxela. Derreter, remexer e arrefriar. E pouco máis ciencia ten. E se non preparastes ningunha lambetada para festexar este día do amor, sempre podedes preparalos en calquera outra ocasión. Que uns bombóns sempre prestan, non cómpre ningunha desculpa para os comer.
Print
Ingredientes
150 gramos de chocolate negro mínimo 75%
60 gramos de chocolate branco
3 culleradas de crema de froitos secos (a miña era de pistacho e cacahuete)
Preparación
- Derretemos a metade do chocolate negro e botámolo no molde. Se o molde leva pauciños, poñémosllos agora. Deixamos que arrefríe.
- Derretemos o chocolate branco e engadimos a crema de froitos secos que máis nos guste. Mesturamos ben.
- Botamos o recheo dentro de cada bombón, repartíndoo ben. Deixámolo uns 10 minutos no conxelador.
- Derretemos a outra metade do chocolate negro e botámola por rina tapando ben o recheo.
- Metemos todo na neveira e deixamos arrefriar.
Sacámolos con moito coidadiño do molde, facendo presión sobre cada un dos bombóns da Candeloria. E xa estarían preparados. O recheo está de vicio. Así que recoméndoo para outras lambetadas. Froitos secos e chocolate branco sempre na miña equipa. E xa vedes que os ingredientes son poucos e a preparación é moi sinxela. Así que se os queredes preparar para a Candeloria, eu diría que aínda estades a tempo 😉
