Xa confesei máis dunha vez que o de facer pan non é o meu. Mais que nada porque non me sae tan ben como me gustaría. Agora ben, o seu arrecendo pola casa e o sabor dun pan caseiro son algo polo que devezo. Por iso intento facer versións máis rápidas e sinxelas de pan, para sacar o antollo e poder comer pan caseiro sen moito choio.
Os bagels que xa fixemos son unha moi boa opción para almorzos ou merendas. E esta receita de focaccia é perfecta para calquera momento. A min gústame moito para a cea. A típica tarde que non sabes moito que facer comezas a elaborar esta focaccia, e para cear xa a tes preparada. Non lle cómpre moita cousa para estar boa. Un pouco de sal en flocos e romeu son suficientes para que estea boísima. Agora ben, olivas verdes ou negras, tomates cereixa, cebola ou queixo son os complementos perfectos. Ou básicamente o que se vos ocorra!
Print
Ingredientes
200 gramos de fariña de semolina
200 gramos de fariña galega de forza
6 gramos de fermento fresco de panadeira
240 gramos de auga morna
10 gramos de azucre
10 gramos de sal
20 gramos de aceite de oliva virxe extra
romeu fresco
sal en flocos
olivas verdes, negras, tomates cereixa, cebola…
PREPARACIÓN
- Nun bol, mesturamos todos os ingredientes agás o aceite, o romeu e o sal en flocos. Amasamos ata que estea todo ben mesturado e non pegue nas mans.
- Engadimos o aceite de oliva e amasamos ata integralo.
- Formamos unha bóla, poñémola nun cunco e tapámola con papel film. Deixamos que repouse a temperatura ambiente durante unha hora.
- Botamos unha boa cantidade de aceite (ata que cubra toda a base) sobre o molde onde vaiamos facer a focaccia. Pode ser nun molde ou directamente na bandexa do forno. E despois botamos a masa por riba. Non é obrigatorio, máis si moi recomendábel empregar un aceite de oliva de calidade. Así, daralle mellor sabod á focaccia.
- Estirámola ben coas puntas dos dedos, facendo buratiños, presionando ata tocar o fondo do molde.
- Botamos romeu, sal en flocos, as olivas, os tomates, a cebola… ou calquera ingrediente que lle queirades botar á vosa focaccia.
- E deixámola fermentar durante uns 45 minutos.
- Co forno xa quente a 185ºC enfornamos durante 25 minutos na parte media do forno.
Ao día seguinte estará tamén de marabilla. Conserva ben tanto o sabor como a textura. Moitos máis días non vos podo dicir porque nunca pasou da mañá seguinte. Para que estes días de frío medren ben as masas, podedes poñer o forno a quentar á temperatura mínima, apagalo, meter a masa dentro e deixar que remate de levedar dentro do forno, a unha temperatura máis adecuada. Senón, pode ser que teñades que aumentar o tempo de fermentación. Como antes de publicar a receita, xa fixemos a focaccia máis dunha vez, no paso a paso veredes fotos das dúas versións que fixemos ata o de agora. Tanto con olivas como con tomates cereixa e cebola, ámbalas dúas focaccias están boísimas. Tamén se poden abrir ao medio, botarlle os ingredientes que queirades e preparar un bocadillo para a merenda ou o almorzo.
