Estou ultimamente moi seareira do limón… Despois ben podo dicir que non me gusta que, evidentemente, non ha colar. Non me gusta nos pratos salgados, mais nas lambetadas…aí moito! Esta lambetada xurdiu de aproveitar a alfábega. Normalmente mércoa para facer pesto. E xa se sabe que hai que facela axiña porque senón ponse pocha e xa non vale. Entón, adoito facer unha boa cantidade de prebe pesto e despois conxelalo para ilo empregando en pratos de pasta, pizza, sándwiches, empanadiñas… O pesto case queda ben en todo. O caso é que desta vez, aínda facendo unha boa cantidade de pesto, sobroume alfábega. E como non ha ía tirar e tiña medo de que se botase a perder, pensei en facer unha lambonada con ela.
O certo é que xa probara a alfábega nunha sobremesa no restaurante A Maceta, en Compostela, e gustárame moitísimo. Tanto que esta sobremesa cae sempre que vou alí comer. A receita é do blogue Lume Brando e a verdade é que o sabor da torta é incríbel! Fiquei absolutamente namorada desta torta. Do seu sabor a limón e alfábega, da textura súper cremosa do recheo e o crocante da parte da bolacha. Para min pasou directamente a ser unha das miñas tortas favoritas. E estou segura de que vos ha pasar igual. Non é nada complicado facela e o resultado non pode ser mellor. Probade e xa veredes como me habedes dar a razón.
Print
Ingredientes
200 gramos de bolachas María
100 gramos de manteiga
- Para o recheo
100 gramos de azucre
90 gramos de manteiga
3 ovos
1 folla de xelatina
Raladura dun limón
60 ml de zume de limón
15 gramos de follas de alfábega
molde de 20 cm
preparación
- Poñemos o forno a quentar a 180ºC. Picamos as bolachas nunha picadora, engadimos a manteiga desfeita e batemos de novo. Cubrimos a base e un chisco as paredes do molde.
- Enfornamos durante 10 minutos e deixamos que arrefríe mentres preparamos o resto dos ingredientes.
- Mesturamos os ovos e a metade do azucre. E poñemos a folla de xelatina a hidratar nun prato con auga.
- Nun cazo botamos o resto do azucre, o zume e a raladura do limón. Poñemos ao lume ata ferver.
- Botamos esta mestura sobre a de ovos, pouco a pouco e sen deixar de remexer cun batedor de varas.
- Poñemos ao lume de novo ata que espese, sen deixar de remexer. Sacamos do lume e engadimos a folla de xelatina.
- Engadimos a manteiga aos poucos e mesturamos.
- Pica as follas de alfábega moi finiñas e engádeas, remexendo ben durante un tempo para que colla moito sabor.
- Botamos sobre a base de bolachas.
Agora só temos que deixar que a torta de limón e alfábega arrefríe na neveira durante, mínimo, 4 horas. O mellor é deixala tapada para que non colla cheiros da neveira.
Xa vos digo que non ha durar moito, pois de verdade que está de vicio, e sempre vos ha saber a pouco e quereredes repetir e repetir. Despois non me digades que non vos avisei. É unha torta perfecta para calquera ocasión, pois pódese preparar o día antes, ten moi boa presentación e de seguro que ha sorprender que unha larpeirada leve alfábega.
