Quiche de estrugas

Con isto das estrugas hai moitos prexuízos. Evidentemente todos veñen porque se te achegas a elas, de seguro as recordas, e non por cousa boa. E é que raro é quen nunca se picou con elas indo polo campo. De feito, o seu nome vén precisamente diso, da urticaria que provocan. Agora ben, hai que dicir tamén que teñen un alto valor nutritivo e son boas para moitas cousas. Ademais das súas propiedades medicinais. E todo iso, nunha sinxela quiche de estrugas.

E si, con elas tamén se poden facer receitas moi sabedeiras. A min gústame moito o seu sabor e a súa textura suave. Coido que a única desvantaxe para a súa degustación é apañalas. Para facelo, déixovos uns cantos consellos:

• sempre con luvas de goma
• mellor na primavera, mais pódense coller en calquera época do ano
• botalas nunha bolsa de tea
• apañar só as 5 ou 6 primeiras follas, pois estarán máis tenras
• desbotar os talos e quedar só coas follas

Cómpre escaldalas sempre antes de empregalas, pois é a única maneira que temos de estar seguras de que non picarán. Polo demais, pódense preparar de moitas maneiras. Eu fixen esta quiche de estrugas  que a verdade é que está espectacular. Foi louvada por todos os comensais, polo que o seu éxito está garantido. 

Print

Ingredientes

• Ingredientes para a masa brisa

• 250 gramos de fariña triga

• 125 gramos de manteiga fría

• 5 gramos de sal

• 80 gramos de auga ben fría

• Legumes para enfornar

• Ingredientes para o recheo

• 100 gramos de estrugas (só as follas) 

• 100 gramos de  queixo

• 100 gramos de leite

• 3 ovos

• 250 gramos de shiitake

• 1 cebola pequena

• Queixo Galmesán picado ou relado ao gusto

Print

preparación

• Preparamos a masa: Mesturamos a fariña, a manteiga e o sal coas mans ata que quede cunha textura areosa. 
• Engadimos a auga ben fría e mesturamos ata formar unha bóla. Non hai que amasar de máis. En canto una, xa está. 
• Poñemos a bóla de masa envolta na neveira durante, mínimo, 15 minutos. 
• Preparamos a quiche:  Lavamos os shiitakes, cortámolos en tiras e fritímolos nunha cullerada de manteiga. Salgamos e reservamos. Fritimos tamén a cebola nun pouco aceite e reservamos. (Tamén podemos fritir a cebola cos shiitakes. Eu fíxeno por separado porque como ía facendo a receita segundo ía vendo como quedaba, boteina despois). 
• Sacamos as follas das estrugas. (Sempre coas luvas e moito coidado. Collendo as follas máis grandes e fermosas, e deixando os talos e as follas pochas ou moi pequenas. Para os 100 gramos, precisei unha bolsa de tea ben chea)
• Pasámoslles unha auga por se houbera algún becho ou morriñada.
• Cocémolas en auga fervendo durante 10 minutos. Despois botámoslle auga fría e reservamos. 
• Batemos os ovos e mesturamos co leite. 
• Engadimos os shiitakes e as estrugas reservadas. 
• E tamén o queixo cortado en anacos, e o Galmesán relado ou picado. 
• Amasamos a masa que tiñamos na neveira co rolo ata deixala finiña e que nos cubra a base do noso molde (23 cm). Farémolo sobre un anaco de papel de enfornar. 
• Picamos a masa co garfo para que non suba. 
• E tapamos con outro papel de enfornar. Botamos as legumes e enfornamos 180ºC durante uns 20 minutos. 
• Sacamos a masa do forno e engadimos o recheo da quiche. 
•  Enfornamos a 180ºC durante outros 20 minutos. 

Podedes, por suposto, empregar unha masa brisa xa mercada. Mais asegúrovos que esta receita é moi sinxela e rápida, e o resultado non ten nada que ver! En canto ao recheo, podedes variar os ingredientes segundo a tempada ou o voso gusto. Xa sabedes que nestas cousas o mellor é probar e degustar ata dar coa que máis vos guste. Iso si, esta está boísima!!! E se aínda estades a dubidar de se probar as estrugas ou non, eu digo SI!!!