Este ano a nosa colleita de kiwis non foi das mellores, mais aínda así temos 4 caixas cheas deles, polo que xa me toca discorrer algunha receita. E canto me gusta! Recoñezo que non é unha froita moi empregada en lambetadas, mais a min gústame moito. E teño que dicirvos que a combinación coco-kiwi deste flan de kiwi é todo un acerto. Ademais, e para non variar, é unha receita que logo se fai, con poucos ingredientes e cun resultado moi sabedeiro.
Este flan de kiwi non queda moi doce, mais nótase o sabor a coco e o kiwi dálle moito sabor. A textura é cremosa, entre un pudin e unha crema de ovos. O bo que ten é que se non tedes kiwis, o non vos gustan ou simplemente queredes probar con outra froita, só tedes que botar calquera outra e sairá igual de saboroso. O proceso é o mesmo e o resultado será bo igualmente, polo que é unha receita que paga a pena gardar.
Print
Ingredientes para 4 flans
3 kiwis
3 ovos
60 gramos de azucre branco
200 ml de leite de coco
manteiga para untar os moldes
azucre en po para decorar (opcional)
4 ramequins ou flaneiras
preparación
- Botamos manteiga nos moldes. Pelamos e cortamos os kiwis en rodelas. E poñemos 3 rodelas de kiwi na base dos moldes. Poñemos o forno a quentar a 180ºC.
- Mesturamos o resto dos ingredientes: ovos, azucre, fariña e leite de coco.
- Botamos a mestura sobre os kiwis.
- E poñemos o resto das rodelas sobre a mestura. É probable que caian, ou que queden asomando un chisco pola masa.
- Enfornamos a 180ºC ao baño María durante uns 30-40 minutos ou ata que vexades que xa callaron.
Deixamos arrefriar de todo, botamos azucre en po por riba e xa podemos meterlles o dente! Tamén se poden decorar con chocolate ou coco relado. Como vedes, é unha larpeirada que está ben boa e que non ten dificultade ningunha. Animádevos a preparala e xa veredes que vos ha encantar.
