Bourekas de berenxena / Eggplant bourekas

Bourekas de berenxena

Unha das vantaxes de ter un blogue de cociña é que dás con receitas de orixes moi variadas e que fan que aprendas non só de gastronomía, senón tamén de historia, cultura, costumes e moitas cousas máis. Aínda non recordo moi ben como esta receita chegou a min, só sei que me sorprendeu ter dado cunha receita de orixe sefardí. Disque estas bourekas eran unha das receitas que os sefardís facían de maneira habitual cando residían na península ata que foron expulsados en 1492. Eu fixen unha versión máis rápida e sinxela, empregando masa para empanadiñas, mais tendo tempo e ganas, eu anímovos a facer a masa caseira ou empregar masa follada, que se asemella máis á caseira. O recheo non pode ser máis sinxelo, mais isto non quere dicir que non estea realmente bo e a combinación dos ingredientes non pode dar un mellor resultado. Imos aló! Continue reading “Bourekas de berenxena / Eggplant bourekas”

Rosas de Sant Jordi / Sant Jordi Roses

Rosas de mazá de Sant Jordi

rosas

Estas rosiñas poden ser o agasallo perfecto para calquera ocasión, xa sexa Sant Jordi, o día da nai ou o día da lambona 😉 Son moi feitiñas, fanse nun plis, quedan de medo e están boísimas! E ademais, só precisamos ingredientes tan sinxelos como mazás e masa de follado. Conta a lenda que cando Sant Jordi matou o dragón que ía devorar á princesa, do seu sangue saiu unha roseira, polo que Sant Jordi colleu unha rosa e doulla á princesa. De seguro que a princesa quedaría aínda máis contenta se esa rosa fora coma estas 😉 Imos aló! Continue reading “Rosas de Sant Jordi / Sant Jordi Roses”

Lasaña vexetariana / Vegetarian lasagna

Lasaña vexetariana

lasaña

Hai uns anos probamos nun restaurante vexetariano unha lasaña que estaba de vicio. Por suposto non levaba carne, mais non soubemos moi ben que era o que levaba, o que si, é que semellaba carne talmente. Despois dun tempo, descubrimos que tal ingrediente era a soia texturizada, un alimento baixo en graxas, rico en proteínas e cun sabor suave e moi agradábel. Dá ben o pego e, se non cho din, probablemente penses que é carne, polo que podedes aproveitar para facerllo a alguén a ver se é quen de adivinar de que está feita a lasaña. Polo demais, os ingredientes de sempre para facer unha boa lasaña rica rica. Para aquelas persoas que sexan veganas, para facer a bechamel, empregaremos aceite de oliva e leite vexetal; e para botar por riba, ou ben queixo vegano ou ben améndoa picada, que lle queda de luxo. Imos aló! Continue reading “Lasaña vexetariana / Vegetarian lasagna”

Champiñóns recheos / Stuffed mushrooms

Champiñóns recheos

champiñóns

Hai receitas que quedan ben, saben ben, son sinxelas, rápidas e, por se fora pouco, saudábeis. E estes champiñóns recheos son unha delas. Ademais, son o petisco perfecto para cando temos convidados, cómense dunha trabada e, ao facerse ao forno, sempre están quentiños e no seu punto. Os recheos poden variar moito, mais desta vez quixen facer unha versión con verduriñas, mozzarella relada e xamón serrano, que sempre casa moi ben cos champiñóns. O xamón serrano farémolo ao forno para que quede ben crocante e moi sabedeiro, xa veredes. Imos aló! Continue reading “Champiñóns recheos / Stuffed mushrooms”

Biscoito de améndoas / Almond sponge cake

Biscoito de améndoas

biscoito de améndoas

Ás veces (moitas, no meu caso) temos a boca doce e devecemos por algunha lambonada que nos saque o antollo. Para iso, aquí vos traio a receita perfecta: un biscoito de améndoas moi saudábel e perfecto para sacarnos o antollo. Só leva ovos, améndoas, mel e limón. Así, podemos gozar dunha larpeirada sen ter que facer unha torta con moito azucre ou moito chocolate. Para a próxima, probarei de facelo cun chisco de cacao, a ver como sae 😉 A textura é moi esponxosa e o sabor suave, húmido e ben doce. Non perdades esta receita de vista, pois hase convertir nunha das vosas favoritas. Imos aló! Continue reading “Biscoito de améndoas / Almond sponge cake”

Mollo pesto con pistachos / Pesto sauce with pistachios

Mollo pesto con pistachos

pesto con pistachos

Unha das razóns polas que sempre quixen ter na casa unha alfábega é porque tiña moitas ganas de facer pesto caseiro coa miña propia pranta. Despois de varios intentos (semella que isto de ter prantas non é o meu punto forte), por fin conseguín unha fermosa pranta de albábega coas súas follas gordechas, cun verde intenso e un arrecendo incrible. Polo que xa iba sendo hora de preparar un mollo pesto para tomar coa pasta. A receita orixinal é con piñóns, mais tendo en conta que o seu prezo é un chisco elevado e que ademais devezo polos pistachos, decidín facer esta versión máis verde, saborosa e orixinal, que vos parece? Como a pranta aínda é algo pequecha, só lle saquei 10 follas de alfábega, para non deixala sen folla ningunha, polo que a cantidade de follas pode variar segundo as follas de alfábega que teñades. De todas maneiras, recordade que o sabor que aportan é intenso, ide probando pouco a pouco ata que teñades o sabor que máis vos guste. Con 10 follas está de vicio! Imos aló!!! Continue reading “Mollo pesto con pistachos / Pesto sauce with pistachios”