Sándwich tricolor / Tricolour sandwich

Sándwich tricolor

Encántanme os sándwiches! Adoitan estar de vicio, prepáranse nun plis e ademais, pódense facer de case calquera cousa que teñamos pola cociña. Iso si, ás veces costa pensar que botarlle para dar coa combinación perfecta e que saiban ben. Este sándwich de tres cores descubrino grazas á miña recente paixón pola gastronomía de Korea, e foi un acerto total! Eu probei a facer dúas versións, a orixinal, con xamón cocido, e unha con salmón afumado, que resultou estar aínda máis saborosa!!! 😀 Se queredes facer unha versión sen carne e sen peixe, cambiaremos o xamón e o salmón por tomate picado, está suuuper rico!!! Se vos atrevedes a preparar este sándwich, de seguro que non vos ides arrepentir! É moi suave, case non hai que mastigar e faise moi cremoso, xa veredes! Imos aló! Continue reading “Sándwich tricolor / Tricolour sandwich”

Sexta Etapa / Sixth Stage: Lizarra / Estella

Sexta Etapa: Lizarra / Estella

Unha das cousas que máis me gustan deste Camiño de Santiago que imos facendo prato a prato é a variedade de produtos e pratos típicos que podemos atopar ao longo desta travesía tan fermosa. Despois dos pementos do piquillo recheos, preparamos un prato que tamén é moi saboroso, mais desta vez, con peixe: O BACALLAU AJOARRIERO. Este prato ten como ingredientes básicos o bacallau, o pemento, a cebola e o prebe de tomate. É unha receita sinxela, rápida e que, ademais, é moi saudábel, para que despois non digamos que non se poden facer pratos saudábeis e rápidos. Hai quen tamén lle bota patacas e pemento verde. Eu como non son moi seareira do pemento verde, non llo botei, mais se a vós vos gusta, adiante! O mellor de cociñar é facer as receitas como máis nos gustan e adaptalas ás nosas preferencias. Facer de cada receita, algo noso. E sen máis, imos aló! Continue reading “Sexta Etapa / Sixth Stage: Lizarra / Estella”

Quinta Etapa / Fifth Stage: Gares / Puente la Reina

Quinta Etapa: Gares / Puente la Reina

Despois de pasar pola capital e degustar eses marabillosos txantxigorris, chegamos a Gares, tamén coñecida como Puente la Reina. Nesta localidade, celebran cada ano entre os meses de setembro a decembro o Mercado do Pemento. Neste mercado, podemos ver non só diferentes variedades de pementos, senón tamén outros tantos produtos típicos desta zona, como son as fabas, patacas ou melóns. Iso si, se hai un pemento que asociamos a Nafarroa, ese é o pemento do piquillo, non si? Hai que dicir que o pemento que ten a denominación de orixe protexida é o de Lodosa. A forma deste pemento é triangular e acostuma a venderse enlatado e previamente cociñado, listo para degustar! Unha vez asado, a maneira máis popular de comelo é recheo. E como a min me gustan tanto os cogomelos, pois tíveno claro dende o principio! PEMENTOS DO PIQUILLO RECHEOS DE COGOMELOS. É unha receita moi saudábel, que alimenta moito e ben e que, ademais, faise moi rápida e campa que non vexas. Teno todo, vaia! E estes pementos teñen un sabor espectacular! Imos aló! Continue reading “Quinta Etapa / Fifth Stage: Gares / Puente la Reina”

Cuarta Etapa / Fourth Stage: Iruña / Pamplona

Cuarta Etapa: Iruña / Pamplona

Seguimos paso a paso e trabada a trabada polo noso Camiño cara a Compostela e, despois de degustar esa txistorra tan saborosa de Zubiri, paramos en Iruña, capital de Nafarroa. A gastronomía xoga un papel moi importante en toda Navarra e, como ben sabedes, en Pamplona iso non queda atrás. Cando fun alí por primeira vez, unha das lambetadas que máis me fascinou e que me parece unha combinación moi curiosa e, ao mesmo tempo, moi acertada, foron os TXANTXIGORRIS, un doce feito, como o seu nome ben indica, con txantxigorris, que non deixan de ser torresmos. E si, levan torresmos e levan canela e o seu sabor é doutro mundo! Estas tortas de txantxigorris acostuman a prepararse, como é evidente, durante a mata do porco que é cando os torresmos están máis frescos. Para facer os txantxigorris, inspireime na receita de Eva Arguiñano e o resultado gustoume moito. O mellor é ir a Iruña e probalos así, mais se podemos ir preparándoos na casa, polo menos matamos o antollo, non é? Imos aló! Continue reading “Cuarta Etapa / Fourth Stage: Iruña / Pamplona”

Parmentier de queixo San Simón con navallas / San Simon cheese Parmentier with razon shells

Parmentier de queixo, navallas ao allo e tellas de San Simón

Hai uns días chegoume un correo electrónico dunha páxina chamada Terra de preguntas na que me ofrecían enviarme uns produtos para que eu os probara e fixera con eles unha receita. Na súa tenda online hai diferentes produtos galegos e todo se fai cun especial agarimo, traballando con pequenos produtores e garantindo unha calidade excelente. Xa había tempo que tiña gana de facer un parmentier, é desas cousas que sempre que as vexo nalgún restaurante, aí vou dereitiña e pido ese prato, así que xa iba sendo hora de poder degustalo na casa. E que mellor que un queixo San Simón co seu sabor afumado para conseguir un parmentier cremoso cun sabor intenso. E para acompañalo, unhas navallas en conserva ao natural, que fritiremos cun chisco de allo e perexil para potenciar aínda máis o seu sabor. Ademais, co queixo, faremos tamén unhas tellas crocantes que son moi sinxelas, campan moi ben e saben aínda mellor. Imos aló! Continue reading “Parmentier de queixo San Simón con navallas / San Simon cheese Parmentier with razon shells”

Receitas de Entroido / Carnival Recipes

Receitas de Entroido

Como non podía ser doutra maneira, había que facer un artigo, que agardamos poder ir ampliando, con tódalas receitas típicas do Entroido, que non son poucas. Así, non teremos que ir rebuscando polo blogue e veremos as diferentes receitas non só de Galiza, que xa temos unhas poucas, senón as que se fan arredor do mundo. Este artigo irémolo actualizando segundo vaiamos facendo máis receitas. Non perdades un segundo e poñédevos coas mans na masa porque todas e cada unha destas receitas está para relamber os dedos! Imos aló! Continue reading “Receitas de Entroido / Carnival Recipes”