Empanada de millo corvo de volandeiras

Desde que descubrín a fariña de millo corvo andaba coa teima de mercala e facer algunha receita con ela. Para quen non o saiba, o millo corvo é un millo de cor negra (de aí o nome) que dá nunha fariña de cor viño tinto. En Meiro (Bueu) traballan por recuperar este millo. Ademais, hai unha festa gastronómica e divulgativa sobre este producto.

empanada de millo corvo

Tiña claro que a primeira receita sería unha empanada. Como xa tiña a receita da empanada de millo de berberechos no blogue, desta vez tocaba facer outra das miñas favoritas, a de volandeiras. Xa sei que normalmente se lle chama empanada de zamburiñas… mais coido que xa vai tocando darlle o seu sitio ás volandeiras, que saben moi ben e ben o merecen tamén. Sobre todo, porque son o que son, volandeiras.

empanada de millo corvo

O importante era, sobre todo, conseguir a fariña de millo corvo. E, a priori, non semellaba unha tarefa sinxela. Mais grazas ás redes sociais e un chisco de investigación, din co Alcacén de Liñares. Nesta tenda en liña venden millo corvo, entre outros produtos. Xa non había máis desculpas, só había que poñerse mans á masa, literalmente.

empanada de millo corvo

Os ingredientes dan para facer unha empanada que ocupa a metade da bandexa do forno. Se queredes facer unha empanada máis grande, que ocupe toda a bandexa, sería simplemente dobrar a cantidade de ingredientes. A min gústame moito como lle queda a fariña de centeo, mais eses 100 gramos podedes botarllos de fariña triga.

Ingredientes

  • Para a masa:
  • 400 gramos de fariña de millo corvo

  • 100 gramos de fariña de centeo

  • 20 gramos de fermento fresco

  • 1 vaso de auga morna para desfacer o fermento

  • Auga, aceite e sal

  • Para o recheo:
  • 3 cebolas

  • 1 tomate relado

  • 1 chorriño de viño branco

  • 1 culleradiña de pemento doce

  • 400 gramos de volandeiras frescas, xa sen a cuncha

Preparación

  • Preparamos a masa: mesturamos ambas fariñas e mais o sal.empanada de millo corvo
  • Desfacemos o fermento fresco nun vaso de auga morna e engadímolo ás fariñas.empanada de millo corvo
  • Mesturamos ben e engadimos máis auga morna ata que teñamos unha textura húmida, como de area de praia mollada. Deixamos repousar mínimo 1 hora.empanada de millo corvo
  • Mentres, preparamos o recheo. Picamos a cebola e fritímola a lume lento ata que fique brandiña.empanada de millo corvo
  • Engadimos un tomate relado ou triturado e mais un chorro de viño branco. Deixamos fritir ata que o viño reduza un chisco. empanada de millo corvo
  • Botamos a culleradiña de pemento doce e as volandeiras. Mesturamos ben durante un minuto e apagamos o lume. É importante non facer de máis as volandeiras para que despois non fiquen secas. Xa se acabarán de facer no forno. Deixamos arrefriar. empanada de millo corvo
  • Cubrimos media bandexa do forno untada de aceite coa masa de millo corvo, axudándonos cun garfo ou das mans. empanada de millo corvo
  • Botamos o recheo xa frío por riba.empanada de millo corvo
  • E tapamos co resto da masa, axudándonos de novo co garfo.empanada de millo corvo
  • Facemos a marca das porcións xa co coitelo antes de enfornar para que despois sexa máis sinxela de separar. empanada de millo corvo
  • Enfornamos a 180ºC durante uns 45-50 minutos.empanada de millo corvo

É difícil dicir cal é o punto exacto da masa de millo, e máis aínda especificar a cantidade exacta de auga. Para min, é sempre o punto de area mollada, non húmida. Podedes ir poñendo anacos coas mans, ou ir extendéndoa co garfo pouco a pouco, ata cubrir toda a base e o recheo. Eu esparexinlle un chisco de fariña antes de enfornar, por iso ten así uns anacos máis clariños.

Leave a Comment

O teu enderezo electrónico non se publicará

*

Este sitio emprega Akismet para reducir o spam. Aprende como se procesan os datos dos teus comentarios.